Mu ijambo yagejeje ku barundi ku munsi w’ejo tariki ya 20 Kanama 2019, ubwo yizihizaga isabukuru y’imyaka ine atorewe kuyobora u Burundi manda we yita iya kabiri ariko hari abayita iya gatatu, Perezida Nkurunziza Pierre yavuze ko ibisigaye agiye kubikora muri iyi minsi mike isigaye ngo amatora abe, ngo ibyo atagezeho azabiharira abazamusimbura ku butegetsi.
Nkurunziza yongeye kumenyesha Abarundi ko atazongera kwiyamamariza kuyobora u Burundi, akaba yamenyesheje ko ibizaba bisigaye kugerwaho bizakorwa n’abazamukorera mu ngata, nk’uko abarundi bavuga ngo “Ntawupfa abimaze”’.
Yagize ati “ibizoba bisigaye navyo bizokorwa n’abazodukorera mu ngata”.
Mu mwaka wa 2015, Abarundi batandukanye barimo abatavuga rumwe n’ubutegetsi hamwe n’amwe mu mashyirahamwe adaharanira inyungu za politike, bamaganye manda ya 3 ya Nkurunziza gusa birangira ayoboye, binaviramo bamwe mu bamurwanya guhunga, abandi barafungwa ndetse n’abatari bake bahaburira ubuzima.
UWIMPUHWE Egidia
